اسمع صدى صوتك

اسمع صدى صوتك مع ضجه الناس = والحس يسري للضماير حسوسي
انسى معاك العزم والفكر والياس = وحبك بقلبي للضمير امغروسي
واهيم في بحر بالامواج غطاس = واسج وانسى عن ربوعي جلوسي
قربك شفا للروح والنود نسناس = وروياك سعدي عن ليالي نحوسي
يامورد الخد المعسل بالالعاس = ياضي جبينه في الظلام الدموسي
العين عين اللي على الكف حباس = والصيد له بمعودات الفروسي
فرخ الحرار امذهب الريش طلماس = اشقر عليه امن النداره هيوسي
ياضي ضيا خده كما نور لمواس = والا شعاع الشمس قبل الغلوسي
عنق الخشوف اللي محاوز عن الناس = دق العنود اللي ترب الطعوسي
يرعى زماليج بها الورد نفاس = يقطف دنق في مرتعه ومحروسي
كنه يحش القلب مرهوف لمواس = حش الصريم اللي نواه اليبوسي
عليه من فقدي ووجدي ولحساس = مثل الضريم اللي عليه امحموسي
نار اتواقد هبها نود لساس = موقد غضاها من حطبها يبوسي
مادمني حي فلا بقطع الياس = حبل الرجا والا قطعت النفوسي
طيفك يراودني مع غفله الحاس = ويسود جوي والمشاعر حبوسي
واتيه في صحرا ولا جيد مرواس = واهيم في دنيا عراها لبوسي