Abdul Rahman Al-Hatami
مراقب عام
الجنسية : 
الهــواية : 
المــزاج : 
المــهنه : 
العمر : 29
تاريخ الميلاد : 01/01/1995
 المشاركات : 11098
النشاط : 18860
وسام : 100
تاريخ التسجيل : 29/12/2008
. : أمسكت بالقلم لأكتب همومي فبكى القلم قبل ان تبكي عيوني
وسام : 
 |  موضوع: وين الوفاء ياأهل الضمير الجمعة 3 أبريل 2009 - 2:57 | |
| مدخل ..}
وين الوفاء يااهل الضمير ..
ليه الجفا ليه القسا
ليه الوحده بعد حياة وعمر طويل
بدعيلك وبدعيلك
ومهما سويت الخاطر يسمحلك
وانت بقلبي كبير ... [ندعوك للتسجيل في المنتدى أو التعريف بنفسك لمعاينة هذا الرابط]قريت موضوع في احد المنتديات قبل كم يوم عن (( دار النقاهة )) والمرضى المقيمين فيها وحالتهم النفسية والجسمية .. وعزمت اني بأمر الله ازورهم .. الأمر كان صعب بالنسبة لي اني اتخذ هالخطوة ،، لأني كنت حاطه ببالي اني ماراح اتحمل المناظر اللي بشوفها .. وكنت افكر دايم بصراحة بزيارة دار المسنات او دار الأيتام بس ..بس بعد ماقرأت الموضوع اللي نزله احد الإخوان جزاه الله كل خير قررت اني اروحلهم .. وان الشيطان دايما كان يطلع لنا اية اسباب عشان يصدنا عن مثل هالأعمال ... لأن الموضوع كان عادي جدا ..اتصلت على احدى قريباتي عشان تروح معي وتشجعني وجزاها الله كل خير وافقت على طول ..اخذت الوصف اللي كاتبه الأخ بنفس الموضوع وركبنا السيارة وتوكلنا على الله ،،وصف موقع المستشفى بالرياض كما كتبه صاحب الموضوع الذي قرأته .... [ندعوك للتسجيل في المنتدى أو التعريف بنفسك لمعاينة هذا الرابط]كأنك رايح الخرج أمش مع الدائري الشرقى متجه جنوب إلى أن يأتيك مخرج عشرين اطلع مع الدائري الجنوبي متجه غرب إلى أن ياتيك مخرج طريق الخرج جنوب اطلع معه على شكل دوار تعد أول إشارتين وأمش تقريبا ثلاثه كيلو إلى أن ترى المستشفى على يمينك !!!!أو أمش مع الدائري الجنوبي متجه غرب إلى أن ترى مخرج معن بن زائده اخرج معه وديور من تحت الكوبري راجع شرق وخلك في الخدمه إلى أن يأتيك مخرج طريق الخرج جنوب اخرج معه وخلك في أيسر مسار وامش تعد أول إشارتين وامش إلى أن ترى المستشفى على يمينك بعد ثلاثه كيلو تقريبا من ثاني إشاره[ندعوك للتسجيل في المنتدى أو التعريف بنفسك لمعاينة هذا الرابط]ملاحظة : المستشفى كان بعد ثالث اشارة مو ثاني اشارة ...المستشفى والله بعيد مكانه .. ياليت كان وسط البلد عشان يتساهلون الناس الزيارة .. بعيد والله مره .. وصلنا المستشفى .. سألنا رجل الأمن اللي واقف كان عند البوابة عن المكان الخاص بالنساء .. وعلمنا الطريقبس بصراحة كان مره غريب الطريق ... طبعا انا مااخذت كاميرتي لانه ممنوع التصوير .. وقفنا السيارة ونزلنا ..وطلعنا على طريق يطلعنا فوق .. مو درج لا .. كأنه طريق للعربات او شي معرف والله .. المهم ..لأن النساء في الدور اللي فوق .. وصلنا فوق .. وطبعا كان السطح .. عند المكيفات والمواصير .. خفنا والله بس لقينا واحد مدري وشودكتور ولا ممرض مدري والله جالس بركن .. ممرض وجالس بركن بالسطح وش يسوي ؟؟؟؟؟؟؟؟ <<< قاعد يدخن قلت للي معي خلينا نسأله وين الطريق لأننا الحين بالسطح ..!!! قربنا منه وارتبك وقام على طول وحط الدخان ورى ظهره بس انا شفتها هههههههه سألناه عن مكان النساء وعلمنا الطريق ..فتحنا الباب ودخلنا وكان عبارة عن سويتين يمين للرجال ويسار للنساء ..طبعا الدور اللي تحت للرجال بعد ,, بس للي حالتهم افضل شوي ويقدرون يستخدمون الكراسي المتحركة ويطلعون فيها شوي .. اما اللي فوق لا كانت للي حالتهم صعبة مره .. اسأل الله لهم الشفاء العاجل ..دخلنا قسم النساء وسألنا عن المسؤولة عشان ناخذ منها اذن بالزيارة .. راحت ممرضة ونادتها .. كانت ممرضة سودانية .. طيبة وخلوقة وساعدتنا كثير وكانت تمشي معنا في كل الغرف وتعرفنا على حالات المرضى .. وكانت كل غرفة تضم سريرين ..دخلنا على اول غرفة ....كان لبنت ومرافقة معها والدتها .. والسرير الثاني حرمة كبيرة بالسن مغمضة عيونها بس تتحرك ويطلع منها صوت زي الأنين ..وقفنا على سرير البنت اللي مرافقة معها والدتها ...قلنا سلامات عسى ماشر وشفييها البنت ؟؟؟؟؟؟؟؟قالت لنا قصتها اللي تقطع القلب ... تقول امها كان قبل المدارس بيومين .. والبنت فرحانة بالمدرسة وانها بتدخل المتوسطة ومجهزة مريولها وجزمتها ..وحنا تقول امها مسوين كنا حفلة نجاح لأطفال العائلة كلهم .. وحاطينها بإستراحة واخذنا قسمين للرجال والنساء وكل قسم فيه مسبح .. تقول كانوا البنات يسبحون ... وكان فيه مكيف صحراوي عند الرجال ماصورته طالعة من عندنا وجنب المسبح طلعت بنتي من المسبح قالت انا جوعانة بطلع اكل شي .. ويوم طلعت بغت تزلق من الموية وراحت تمسكت بماصورة المكيف .... وطبعا كان المكيف ملتمس .. والبنت تكهربت الين طاحت تقول ودينا للمستشفى وعلى العناية المركزة اللي تضم حالات مختلفة من الامراض .. راحت البنت مع نقص المناعة اللي صار معها وصار فيها كل الامراض اضافة الى تأثير الكهرباء على المخ عندها ..الحادث كم له الحين ؟؟؟؟؟ لها اربع سنوات على هالحالة ...طبعا البنت ماتستخدم لا يدينها ولا رجلينا لانها معوقة تماما بشكل رباعي .. بس تطالعنا بعيونها وفاتحة فمها اثناء ماكنا نتكلم مع والدتها كانت تطلع اصوات عالية بعدها قالت لها امها يابنتي سلمي على خالاتك .. قربنا منها نكلمها ونسلم عليها .. كأنها والله فهمت علينا لانها توقفت عن الصراخ وتطالعنا بحده .. مع ابتسامة خفيفة سولفنا معها شوي وقرينا عليها ودعينالها ..لفيت انا على سرير اللي جنبها ... كانت حرمة كبيرة بالسن حاولت اكلمها ماترد بس مغمضة عيونها وتحرك فمها وتعابير وجهها ... وكأنها متضايقة من شي او تبي شي ..قالت ام البنت اقروا عليها تراها ترتاح كثير بالقراية .. وقفت على راسها وقريت عليها ... والله اثناء ماكنت اقرا عليها .. هدأت كثير ووقفت تغير بحركات وجهها وصارت كأنها نايمة ... اللهم اشفها وعافها يارب ... سألت الممرضة المرافقة معنا قلت يزورها احد قالت لها ولد بس نااااااادر مره يجيها ... !!!!!!!!!طلعنا من غرفتهم ورحنا للغرف الثانية ... [ندعوك للتسجيل في المنتدى أو التعريف بنفسك لمعاينة هذا الرابط]اغلبهم مسنات .. وكلهم لهم اولااااااااااااد وتاركينهم في هذا المكان البعيد والخال من الناس الا الممرضات والعاملات .. وحالتهم المرضية ماتستدعي وجودهم بشكل دائم بالمستشفى ..[ندعوك للتسجيل في المنتدى أو التعريف بنفسك لمعاينة هذا الرابط]حالة من الحالات كانت لمسنة بالمستشفى لها 20 سنة وحالتها طبعا لا حية ولا ميتة .. حالة ثانية لمريضة اصيبت بحروق قوية بالثلاثين من عمرها او الاربعين .. تقريبا والغريب انها ماتدركنا مع انها مفتحة عيونها بس ماتتحرك دعينا لها وحاولنا نكلمها بس ماترد علينا ... ( اللهم اشفها وعافها عاجلا غير اجل )شفنا حالات حوادث سيارات كان سبب لذهاب العقل واعاقة جسمية كاملة وفي النهاية لدار النقاهة ؟؟؟؟حالات كثيرة كان سببها جلطات .. وبالتالي اعاقة جسمية وايضا في النهاية دار النقاهة ....اللي لاحظناه وجود اجهزة تلفزيون في داخل كل غرفة تقريبا .. والقناة على ام بي سي ( عناء ورقص ) قلنا للممرضة اللي معنا .. ليه ماتحطون لهم قناة المجد على قناة القرآن الكريم ..؟؟؟؟؟قالت : وهم فاهمين حاجة ؟؟؟قلتلها : مو عشان هم مو فاهمين شغلوا لهم القرآن ينفعهم ومافيه فايدة لهم من أي قناة ثانية قالت معرف انا اصلا الادارة هي اللي حاطة القناة قلت انا زين بنبلغهم ..قلنا لها : وش الاشياء اللي ممكن يحتاجونها ؟؟؟ قالت : كل شي متوفر بس هم يستهلكون المناديل والشامبو والكريمات والبودرة بكثرة ... لاننا نروشهم كل يوم والبودرة والكريمات عشان ماتحرقهم اجسامهم من طول جلسة السرير ... بصراحة .. المكان مره نظيف والمريضات نظاف وعناية فيهم حلوه ... بس ينقصهم اهم شي ....( الأهل ) [ندعوك للتسجيل في المنتدى أو التعريف بنفسك لمعاينة هذا الرابط]حتى نفس الممرضة قالت .. اغلبهم محتاج عناية نفسية اكثر من جسمية مرينا على آخر غرفة ....كانت فيها امرأة كبيرة بالسن ومعها خادمتها ... وجلست اضحك واسولف معها بس هي ماكانت تبينا ههههههههه الله يشفيها ...سلمت عليها .. وقلتلها وشلونك ياخالة ؟؟؟؟ طبعا كانت معطيتني جزء من وجهها بس ... والباقي من الجهة الثانية ... وكانت شبه جالسة قالت : يعني لو انا طيبة شفتيني بهالمكان ؟؟؟؟؟؟؟؟؟؟ قلت انا : سلامات ياخالة ماتشوفين شر ،، ان شاءالله بتكونين احسن ،، لا ماشاءالله شوفي شكلك مبين نشيطة وطيبة <<<< اسمع بالايحاء هههههههههههقالت لي بشينة نفس : اذكري الله بس اذكري الله انا ابتسمت وقلت ماشاءالله ياخالة تبارك الله ،،الا ياخالة عندك عيال ؟؟؟؟ قالت : ايه عندي <<<< وقتها شغالتها جاوبت معها : ايه عندها ثلاثة اولاد مافيه بنات ...الله المستعان عندها ثلاث عيال وتاركينها بالمستشفى ... ايه ماقصروا حاطينلها شغالة المهم .... قلتلها طيب يجون يزورونك عيالك ياخالة ؟؟؟؟؟؟قالت من غير نفس : احيانا قلتلها ياخالة انتي من وين <<<<<<< يقالك بسولف معها قالت : من القصيم قلت : ماشاءالله ياخالة من القصيم الله يحيك مثلي اجل انا من القصيم بعد ابيها تفلها بس ماش نفسيتها مو تمام ماابتسمت ابدا ... عكس نفسيات الباقيات قلتلها : من وين من القصيم ياخالة ؟؟؟؟قالت : يوم اني صغيره كنت من البكيرية ضحكت وقلتلها والحين اجل من وين صرتي ياخالة ههههههههههقالت : مره من الجنوب ومره من اماكن ثانية ضحكنا كلنا ... قلت : طيب ياخالة توصينا شي ولا تحتاجين شي ؟؟؟؟؟؟؟قالت : ايه ابيكم تهللون وتروحون هههههههههههههههههههه سلمنا عليها ودعينا لها .... شكرنا المشرفة المتعاونة جدا معنا وطلعنا من الدار ...[ندعوك للتسجيل في المنتدى أو التعريف بنفسك لمعاينة هذا الرابط]همسة ...تخيل نفسك بهذه الدار يوم واحد فقط ... ادعوا الجميع لزيارتهم واحتساب الأجر والمثوبة من الله سبحانه وتعالى في زيارة المرضى وآخر دعوانا ان الحمدلله رب العالمين ،،،كاتبة الموضوع :اختكم ميعـــــــــــــــاداثناء زيارتي للدار لهذا اليوم الجمعة [ندعوك للتسجيل في المنتدى أو التعريف بنفسك لمعاينة هذا الرابط]مخرج ..}صوتي يناديك وطول عمري احتريكزرني او اسأل عني ...حقي يوم كبرت تحضني مثل ماحضنتك وانت صغير | |
|
فارس احمد علي
مراقب عام
الجنسية :
المــزاج : 
المــهنه : 
العمر : 39
تاريخ الميلاد : 11/05/1985
المشاركات : 5871
النشاط : 12257
وسام : 19
تاريخ التسجيل : 07/03/2009
| | موضوع: رد: وين الوفاء ياأهل الضمير السبت 4 أبريل 2009 - 12:19 | |
| | |
|
Abdul Rahman Al-Hatami
مراقب عام
الجنسية :
الهــواية :
المــزاج :
المــهنه :
العمر : 29
تاريخ الميلاد : 01/01/1995
المشاركات : 11098
النشاط : 18860
وسام : 100
تاريخ التسجيل : 29/12/2008
. : أمسكت بالقلم لأكتب همومي فبكى القلم قبل ان تبكي عيوني
وسام :
| | موضوع: رد: وين الوفاء ياأهل الضمير السبت 15 أغسطس 2009 - 5:57 | |
| مشكور على المرور والمتابعة ارئعه | |
|
